Кондак на Преображение Господне, глас 7-й.
На горе преобразился еси, и якоже вмещаху ученицы Твои,
славу Твою, Христе Боже, видеша: да егда Тя узрят распинаема, страдание убо уразумеют вольное,
мирови же проповедят, яко Ты еси воистинну Отчее сияние.
Наверх
Тропарь праздника Преображение Господне, глас 7-й.
Преобразился еси на горе, Христе Боже, показавый учеником Твоим славу Твою, якоже можаху; да возсияет и нам грешным свет Твой присносущный, молитвами Богородицы,
Светодавче, слава Тебе.
Наверх
Величание Преображению Господню.
Величаем Тя, Живодавче Христе, и почитаем пречистыя плоти Твоея преславное Преображение.
Наверх
Преображение Господне. Стихиры на Господи воззвах. Глас 4.
Прежде Креста Твоего, Господи, гора Небеси подобяшеся, и облак, яко сень, протязашеся, Тебе преобразующуся, от Отца же свидетельствуему: тамо бе Петр со Иаковом и Иоанном, яко хотяху быти с Тобою и во время предания Твоего, да видевше чудеса Твоя, не устрашатся страданий Твоих, имже поклонитися нам в мире сподоби, великия ради Твоея милости.
Прежде Креста Твоего, Господи, поим ученики на гору высоку, преобразился еси пред ними, лучею силы озаряя их, отсюду убо человеколюбием, отнуду властию, показати хотя
Воскресения светлость, егоже и нас, Боже, в мире сподоби, яко Милостив и Человеколюбец.
Гора, яже иногда мрачна и дымна, ныне же честна и свята есть, на нейже нозе Твои стоясте, Господи, превечное бо сокровенное таинство напоследок явлено сотвори, страшное Твое Преображение, Петру, и Иоанну, и Иакову. Иже, такова сияния лица Твоего не терпяще, и светлости риз Твоих, ниц на лице земли покрывахуся, иже и ужасом одержими, дивляхуся, видяще Моисея и Илию, глаголюща с Тобою, хотящая приключитися Тебе: и глас от Отца свидетельствоваше, глаголя: Сей есть Сын Мой
возлюбленный, о Немже благоизволих, Того послушайте, Иже и дарует мирови велию милость.
На горе высоце преображся Спас, верховныя имея ученики, преславно облистал есть, показуя, яко высотою добродетелей облиставше и Божественней славе сподобятся.
Глаголющии со Христом Моисей и Илия показоваху, яко живыми и мертвыми обладает и Иже древле законом и пророки глаголавый есть Бог, Емуже и глас Отечь из облака светла послушествоваше, глаголющий: Того послушайте, Иже Крестом ада пленивша и мертвым дарующа живот вечный.
Наверх
Преображение Господне. Слава и ныне, Глас 6.
Прообразуя Воскресение Твое, Христе Боже, тогда поят три Твоя ученики, Петра и Иакова и Иоанна, на Фавор возшел еси. Тебе же, Спасе, преобразующуся, Фаворская гора светом покрывашеся, ученицы Твои, Слове, повергоша себе долу на земли, не терпяще зрети невидимаго зрака, Ангели служаху страхом и трепетом, небеса убояшася, земля вострепета, видяще на земли славы Господа.
Наверх
Задостойник. Ирмос 9-й песни Канона Преображения Господня.
Рождество Твое нетленно явися: Бог из боку Твоею пройде, яко плотоносец явися на земли, и с человеки поживе. Тя, Богородице, тем вси величаем. Порождение Твое нетленно явилось: Бог из чрева Твоего произошел, как носитель плоти явился на земле, и с людьми жил. Тебя, Богородица, поэтому все величаем.
Наверх
|
