Иоаким и Анна поношение бесчадства, и Адам и Ева от тли смертныя
свободистася, Пречистая, во святем рождестве Твоем. То празднуют и людие Твои, вины
прегрешений избавльшеся, внегда звати Ти: неплоды раждает Богородицу и Питательницу жизни нашея.
Рождество Твое, Богородице Дево, радость возвести всей вселённей:
из Тебе бо возсия Солнце Правды – Христос Бог наш, и, разрушив клятву, даде благословение, и,
упразднив смерть, дарова нам живот вечный.
Чужде матерем девство, и странно девам деторождение; на Тебе, Богородице, обоя устроишася.
Тем Тя вся племена земная непрестанно величаем.
[Чуждо матерям девство, и невозможно девам деторождение; на Тебе же, Богородица, совершилось то и другое, потому все мы, народы земные, непрестанно величаем Тебя].
Стихиры на "господи Воззвах". Праздник Рождества Богородицы.
Днесь Иже на разумных Престолех почиваяй Бог, Престол свят на земли Себе предуготова: утвердивый мудростию Небеса, Небо одушевленное человеколюбием содела: от неплоднаго бо корене, Сад живоносен израсти нам, Матерь Свою, Иже чудес Бог, и ненадеющихся Надежда, Господи, слава Тебе.
Сей день Господень, радуйтеся, людие: се бо Света чертог, и Книга Слова Животнаго, из утробы произыде. И иже к востоком дверь рождшися, ожидает входа Святителя Великаго, Едина и Единаго вводящи Христа во вселенную, во спасение душ наших.
Днесь неплодная врата отверзаются, и Дверь девическая Божественная предгрядет. Днесь Плод раждати благодать начинает, являющи миру Божию Матерь, Еюже земная с небесными совокупляются, во спасение душ наших.
Днесь всемирныя радости провозвещение, днесь возвеяша ветри, спасения провозвестницы, естества нашего разрешается неплодство: неплоды бо мати показуется, Девствующия и по Рождестве Зиждителеве, из Неяже чуждее присвояет иже естеством Бог, и заблуждшым плотию спасение содевает, Христос Человеколюбец, и Избавитель душ наших.
Днесь Иже на разумных Престолех почиваяй Бог, Престол свят на земли Себе предуготова: утвердивый мудростию Небеса, Небо одушевленное человеколюбием содела: от неплоднаго бо корене, Сад живоносен израсти нам, Матерь Свою, Иже чудес Бог, и ненадеющихся Надежда, Господи, слава Тебе.